KISAH TAULADAN BANJAR

 Kisah Si Kancil wan Buhaya

Pada suatu hari, Si Kancil bajalan di dalam hutan. Inya lapar banar wan handak mancari makanan. Kada jauh dari tampat inya, ada sabuah batang banyu nang di sabarangnya banyak buah-buahan nang nyaman.

Tapi, batang banyu itu dihuni banyak buhaya.

Si Kancil bapikir, “Kaya apa aku kawa manyubarang batang banyu ini tanpa disambar buhaya?”

Lalu Si Kancil mandapat akal.

Inya badiri di pinggir batang banyu, lalu bakuriak, “Hai, Buhaya! Kaluarlah! Aku mambawa habar panting dari Raja Hutan!”

Mandangar itu, saikung buhaya mancangol.

“Apa habarnya?” takuni Sang Buhaya.

Si Kancil manjawab, “Raja Hutan handak tahu barapa banyak buhaya nang tinggal di batang banyu ini.

Bubuhan buhaya harus babaris dari sini sampai ka subarang, supaya aku kawa mahitung jumlahnya.”

Buhaya-buhaya itu lalu babaris di dalam batang banyu.

Si Kancil maluncat ka balakang buhaya nang pertama.

“Sato!” ujarnya.

Lalu inya maluncat lagi ka balakang buhaya nang kadua.

“Dua!”

Kaitu tarus sampai Si Kancil akhirnya sampai di subarang batang banyu.

Sampai di daratan, Si Kancil kukulikik, tatawa. 

“Tarima kasih, Buhaya! Pian sudah mambantu aku manyubarang!”

Hanyar para buhaya sadar bahwa sidin sudah di dustai.

Si Kancil lalu badadas bukah masuk ka hutan sambil bailun, “Mun kita pintar bapikir, masalah nang sulit kawa diatasi.”

Pangajaran : Jangan mudah parcaya lawan tipu daya urang lain, wan gunakan kapintaran dangan baik gasan manyalasaikan masalah.

Kaluadagang

Al Banjary

Kisah “Unta wan tuannya”

Pada suatu malam, ada saurang lalaki guring di dalam khemah awan saikung unta.

Kerna  malam itu dingin banar. Unta lalu bapandir awan tuannya:

“Tuan, bulihkah ulun masukkan kapala sadikit ka dalam khemah? Di luar dingin banar pang.”

Tuannya merasa kasian, lalu baunggut wan mangabulkan.

Kada lawas, unta bapandir lagi:

“Tuan, bulihkah ulun masukkan batang gulu ulun jua? Sakadar supaya kada talalu dingin.”

Tuannya manjawab, “Iya, bulih, ayuhak.”

Habis itu, unta mulai mamasukkan bahunya, awaknya sadikit-sadikit, sampai akhirnya saluruh awak unta sudah di dalam khemah.

Tuan yang makin kakipitan akhirnya kada tahan lagi, lalu tapaksa kaluar guring di luar.

Unta gin manyambung pandir:

“Maaf, Tuan. Khemah ini sudah kada cukup luas gasan kita badua.Ulun saurang haja lah”

Pangajarannya

Jangan talalu mudah mambari ruang tanpa batas. Mun batas kada ditantukan dari awal, urang yang dibari sadikit ruang bisa tarus manambah ruang sampai akhirnya kita sorang kahilangan tampat.

Ungkapan singkatnya:

“Mula-mula kapala unta masuk, akhirnya tuan yang guring di luar.”

Kaluadagang

Al-Banjary